Jeppaferðin í Jökulheima og hugsanlega Grímsfjall eða Breiðbak milli jóla og nýárs var ágætis tilbreyting við það letilíf sem er annars á manni á þessum tíma. Mér tókst með mjög litlum fortölum að fá hann Guðbjart vin minn sem kóara og leiðsögumann. Ferðin var skipulögð sem nýliðaferð af 4x4 og sá Einar Kjartans um skipulagninguna sem tókst vel. Honum tókst meira að segja að sjá til þess að veðrið og færið væri alveg þokkalegt á jöklinum. Geri aðrir betur.

Í hópnum voru 8 bílar af nánast jafn mörgum gerðum. Lagt var í hann frá Hálendismiðstöðinni í Hrauneyjum um níu leytið á laugardeginum 29 og ekið sem leið lá í Jökulheima og vorum við þar vandræðalaust um tólf leitið. Lítill snjór var á leiðinni og fylgdum við veginum mestan part leiðarinnar. Í Jökulheimum voru miðstöðvarnar bilaðar í báðum skálunum og bar staðurinn því nafnið með rentu. 15 gráðu frost var úti og inni og frekar hvasst þ.e. úti, inni var logn. Til þess að ná úr sér hrollinum var ákveðið að kíkja á jökulinn og vita hvort ekki væri hlýrra þar. Mjög blint var á jöklinum vegna skafrennings en við sáum í heiðan himinn mestan part leiðarinnar. Vegna frostsins var færið þannig að það tróðst illa undir bílunum en var ekki verra en það að tveir bílar á 33” (Súkka og 4Runner) voru komnir með okkur sem vorum á 38” á Grímsfjall um fimmleytið. Þar var 20 gráðu frost og strekkings vindur sem lægði þegar leið á kvöldið. Hlýtt var í skálanum og einnig fínnt í gufunni. Grilluð voru lambalæri (auðvitað) og drukkið m.a. jólaöl með. Mjög fallegt veður var um kvöldið fullt tungl sem lýsti upp jökulinn og var mikill rosabaugur um það sem spillti ekki fyrir.

Á sunnudeginum var keyrt til baka með viðkomu í jökulhellum sem hafa myndst norðan í fjallinu eftir síðasta gos. Skyggni var frekar slæmt alla leiðina niður af jöklinum en rofaði til við jökuljaðarinn. Þar sáum við mikinn svelg sem hafði myndast í ísinn og var hann það stór að allir bílarnir hefðu komist fyrir í honum. Það mynnti okkur á að það borgar sig að fara varlega við akstur á jöklum.

Heim voru svo flestir komnir seinni part sunnudagsins.

Þegar við ferðafélagarnir fórum að skoða GPS ferilinn eftir að heim var komið rákumst við á misræmi sem við vorum ekki sáttir við. (Sjá mynd af slóðum). Blái ferillinn sem er GPS slóðin okkar sýnir að við fórum sunnan við sigketilinn á leið okkar uppeftir eins og fyrir er lagt. Á leiðinni til baka er blái GPS ferillinn óeðlilega beinn (eins og tækið hafi ekki skráð ferilinn í minnið) og sýnir að við höfum farið norðan megin við sigketilinn sem við gerðum ekki og væri ég ekki að skrifa þetta ef svo hefði verið. Til þess að skoða þetta betur fengum við GPS slóða frá einum ferðafélaga okkar og er hann sýndur á myndinni sem rauður að lit. Eins og sést þá falla slóðarnir saman á leiðinni uppeftir og er það eðlilegt þar sem bílarnir keyrðu hver á eftir öðrum.  Misræmi milli slóðanna kemur fram þegar við förum til baka á sunnudagsmorgninum. Þá er eins og GPS tækið okkar (Garmin 12MAP) skrái ferilinn ekki niður í byrjun ferðar og sýnir beina línu í stað þess að falla saman með rauða slóðanum eins og það gerði á leiðinni uppeftir því við ókum í halarófu. Eftir ca 3km akstur þá tekur tækið við sér og skráir ferilinn rétt.
En hvers vegna lét GPS tækið svona? Okkar skýring eftir að hafa skoðað tæknilegar upplýsingar um það á Garmin vefnum er að við höfum ofboðið kuldaþoli þessi. Á Grímsfjalli var 20° frost og hafði GPS tækið verið skilið eftir í bílum um nóttina. Garmin segir á vefsíðu sinni að þeir ábirgist áræðanleika Garmin 12MAP ef hitastig er frá -15° til +55°. Þetta á reyndar við um nánast öll GPS tæki.  Það er þess vegna öruggast að taka GPS tækin með inn í hús yfir nóttina ef þess er kostur.

Hér eru nokkrar myndir sem hinir og þessir tóku í ferðinni. Fleiri myndir úr ferðinni er hægt að sjá á vefsíðu Umhverfisnefndar 4x4.

Skálarnir á Grímsfjalli

Einar kveikir á grillinu. 20 gáðu frost og strekkingur

Brynju og Helga að hitna í skálanum

Einar búinn að finna op á Jökulhelli

Það var dimmt og þoka þarna niðri og aðstæður til myndatöku ekki góðar

Á góðri siglingu á jöklinum

[Tómstund.net] [Fjölskyldan] [Ferðalög] [Vefsíður] [GPS dótakassinn]